Օր է լինում

Օր է լինում
Ես ծնվում եմ առավոտյան
Որ մահանամ հենց կեսօրին
Առանց խոսքի ու բողոքի
Առանց երեկոյան ոտնահետքի
Առանց քեզնից հիշողության
Միայն ներկան, ներկան, ներկան

Ես այնքան փոքր եմ

Ես այնքան փոքր եմ
որ տեղավորվում եմ
տնից՝ նպատակակետ
ու նպատակակետից տուն
ընկած ճանապարհին
որն, ի դեպ, ընդամենը 15 րոպե է

***

Քեզնից հետո ոչինչ չի մնա.

միայն քամին՝ մազերս խառնող
միայն քաղաքը՝ փոշուց խեղդող
միայն ամառը՝ առանց հաջորդի
միայն ժամերը՝ առանց րոպեիմիայն օրերը՝ առանց քո բույրի
միայն իմ սերը՝ առանց քո սիրո

Լռե՞մ

Եթե որոշեմ ես բարձր լռել
Գուցե ափսոսամ որ մնացել եմ
Ճամփաբաժանի ուղիղ մեջտեղում
Գուցե շփոթվեմ
երկու կողմերում սիրված լինելու անզորությունից